هندابوون د ناڤ ژماره‌یان دا

15 نیسان، 2022

كۆڤان حسێن

حوسنى موباره‌ك سه‌روكێ مسرێ یێ به‌رێ ئاخفتنه‌كا بالكێش هه‌یه‌ كو دبێژیت؛ رێڤه‌برنا وه‌لاته‌ك وه‌ك مسرێ ناكه‌ڤیته‌ د خانا مافێ مرۆڤى یان دیمۆكراسیه‌تێ دا چونكى ئه‌ركێ سه‌ره‌كى یێ سه‌رۆكێ مسرێ دابینكرنا سێ دانێن خوارنێ یه‌ بۆ 85 ملیۆن مسریان بێ كو مه‌ سامانه‌كێ سرۆشتى هه‌بیت یان ئاخه‌كا تێرا مه‌ نانى په‌یدا بكه‌ت.

ئه‌وا راست بیت ل پاشبه‌ندێ هه‌مى نووچه‌یان، پتریا وه‌لاتێن جیهانێ بیرا زێده‌بوونا مرۆڤێن خوه‌ دكه‌ن، ئه‌رێ ئه‌ڤ زێده‌بوونا بێ سنوور چ ڤه‌رێژێن باش و خراب بۆ جڤاكى و تاكێن جڤاكى هه‌یه‌؟ دبیت بۆ سیاسیان زێده‌بوونا مرۆڤان كارته‌كا قازانجێ بیت یان هه‌ر چ نه‌بیت ده‌نگده‌ره‌ك زێده‌ دبیت و دبیت بۆ كه‌مه‌نه‌ته‌وه‌یان به‌رده‌وامیا نفشى بیت هه‌تا نه‌ برهن و (ئیجاخ كور) نه‌بن.

هنده‌ك وه‌لات وه‌ك چینێ زێده‌بوونا خۆ یا مه‌زن ب جوانى سه‌ره‌ده‌ریێ ل گه‌ل دكه‌ن وه‌ك بازاره‌كێ ناڤخۆیى یێ ب هێز، لێ هنده‌ك وه‌لات ژى گیرۆده‌ى ژمارا مرۆڤێن خۆ بووینه‌ هه‌تا نانى په‌یدا دكه‌ن وه‌ك هندستانێ. راسته‌ دو وه‌لاتێن مه‌زنن و ئاستێ وه‌رارێ ژى تێدا گه‌له‌ك باشه‌، لێ ب سه‌دان سالێن دى هندستان ژ هه‌ژاریێ قۆرتال نابیت وه‌ك ئه‌و ب خۆ دبێژن.

عارف قوربانى رۆژنامه‌ڤانێ كورد دویڤچوونه‌كا ریشالى ل سه‌ر عه‌ره‌بێن حه‌وێجه‌ ل كه‌ركوكێ كربوو و دیار كربوو كو كێم كه‌سان ژنه‌ك تنێ هه‌یه‌ و هه‌میان ژ دو ژنان پتر هه‌نه‌ و بێ ژماره‌ ژى زارۆكا په‌یدا دكه‌ن، نه‌ دویره‌ رۆژه‌كێ د ریفراندۆما مادده‌یا 140 دا ئه‌و عه‌ره‌ب ب تنێ پرسا كه‌ركوكێَ بۆ عه‌ره‌بان ئێكلاكه‌ن و ژ راست ژى كورد و توركمان كێمترین زارۆكان ل كه‌ركوكێ په‌یدا دكه‌ن، ئه‌ڤه‌ شاره‌زاییه‌ یان ژ خۆ هه‌ما ب سرۆشتێ خۆ هۆسایه‌؟ بێگومان یا سرۆشتى نینه‌ چونكى كێم كه‌س ل ڤى وه‌لاتى هه‌نه‌ كو سیاسى نه‌بن. 

ژ راستى هندى ئه‌م ئیراقى بین و د ڤى وه‌لاتى دا بژین، دڤیا ئاگه‌هیا مه‌ ژ ڤێ پرسێ هه‌بیت، وه‌زاره‌تا نه‌خشه‌كێشانا عێراقى دبێژیت؛ ئیراق سالێ ب ملیۆنه‌ك و سێ سه‌د هزار كه‌سان زێده‌ دبیت و نوكه‌ ئیراق ژ 40 ملیۆن كه‌سان بۆرى یه‌. هه‌تا ڤێرێ نۆرماله‌، لێ بریاره‌ ئه‌گه‌ر ب دروستى ده‌ستوورێ ئیراقێ بهێته‌ سه‌پاندن، هه‌مى كار و خزمه‌ت و بودجه‌ و مووچه‌ و دامه‌زراندن و گه‌شه‌پێدان دێ ل دویڤ ژمارا مرۆڤان بیت، ب ڤى ده‌ستودارى بیت، كورد ل ئیراقێ پشتى 20 سالان چ حسابه‌ك بۆ ناهێت كرن چونكى به‌رناكه‌ڤیت؟!

پرس ئه‌ڤه‌یه‌ كورد به‌رامبه‌ر ڤى شه‌رێ مه‌زن چ بكه‌ن كو هێدى هێدى و ل سه‌ر خۆ ئه‌ندازه‌یا جڤاكى د به‌رژه‌وه‌ندیا لایه‌نه‌كێ دا كار دكه‌ت؟ دیتنا من، چاره‌ ئه‌وه‌ ئه‌م ژى كه‌سان زێده‌كه‌ین؟َ! بێى ئه‌م هزرا نان و په‌روه‌ردێ بۆ بكه‌ین، یان هێدى هێدى هه‌تا ئیراق سه‌رژمێریاریا خۆ دكه‌ت كو هنده‌ك په‌یام هه‌نه‌ ژ به‌ر هندێ نوكه‌ سه‌رژمێریێ ناكه‌ت.

ژ راست بیت و برایێن مه‌ یێن عه‌ره‌ب ب ڤى ره‌نگى زێده‌ ببن و ئه‌م ژى ل سه‌ر ئاستێ خۆ به‌رده‌وام بین، دویر نینه‌ دناڤ ژماره‌یان دا به‌رزه‌ ببین. شاره‌زا و بسپۆرێن كوردان ل ناڤه‌ندێن سیاسى و ئه‌كادیمى و جڤاكى نه‌چارن ب زویترین ده‌م ئاڤریه‌كێ ل ڤێ پرسێ بده‌ن، ئیراق ب زێده‌بوونا مرۆڤان یا هه‌ڤركیا (به‌نگالێ) دكه‌ت.