"رێنمایێن نوو یێن دەستویریێن ئاڤاھیان چ قانوون پێ نینن"

08 گۆلان، 2022

ئەمیر ئەترووشی

مەرجێن نوی یێن دەستویریێن ئاڤاکرنا خانیان ل پارێزگەھا دھۆکێ کو ھەر ژ دەستپێکا هەیڤا سێ یا ئەڤ سالە ژلایێ باژێرڤانیێ ڤە چووینە د وارێ بجهئینانێ دا چ قانوون پێ نینن و تنێ ھندەک رێنمایی نە دەرچووین و ئاڤاکرنا خانیان گەلەک و گەلەک ب زەحمەت بکەڤیت، ژبەرکو ئێدی ئاڤاکرنا خانیان دێ چیتە دبن سەرپەرشتیا نڤیسینگەھێن ئەندازیاری دا و بۆ ئاڤاکرنا ئێک خانیێ 200 مەتری رەنگە خودانێ خانی پارەکێ زێدە بدەت ھەتا بشێت خانیێ خو ئاڤابکەت.

ل گۆرەی زانیاریێن من وەرگرتین، ئەڤ رێنمایێن نوی ژلایێ سەندیکا ئەندازیاران ڤە دەرچووینە و چ قانوون پێ نینن، ئەگەر ئەز وەلاتیەک بم و من بڤێت بۆ نموونە خانیەکێ 200 مەتری ئاڤا بکەم، پێدڤیە ئەندازیارەک کو پیشەیا وی کارێ ئەندازیاری بیت و ل نڤیسینگەھا شیرەتکاریا ئەندازیاری کاربکەت نەخشەکی بۆ خانیێ من چێکەت، ل گۆرەی ڤان رێنمایێن نوی بۆ ھەر مەترەکا چوار گۆشە دێ ئێک دولار و نیڤ ژ من ھێتە وەرگرتن، ئانکو بۆ خانیەکێ دو تابق و چێکرنا نەخشەی دێ 600 دولاران دەم، بۆ زانین کەس خانیا بێی ئەندازیاران ئاڤا ناکەت، بەلکو بەری نوکە دشیان بۆ ڤێ چەندێ ب تنێ ب 100 دۆلاران نەخشەکی ل دەڤ ئەندازیارەکی بۆ خۆ چێکەن.

ئەڤە ھەمی ژی چنە، ئێدی پێدڤیە نڤیسینگەھێن ئەندازیاری سەرپەرشتیێ ژی ل سەر خانیێ من بکەت، بۆ نموونە بۆ ھەر مەترەکی بۆ سەرپەرشتیێ ب سێ دولارانە، ئانکو بۆ ھەردو قاتێن خانیێ 200 مەتری دێ 1200 دۆلاران دەم، ئەرێ بەرژەوەندیا من د ڤان رێنمایان دا چیە؟!!!

من پەپوەندی ل گەل ئەندازیار وەلات سەعدی، سەرۆکێ باژێرڤانیا زاخۆ کر و ل گۆرەی ڤان رێنمایێن نوی و بجهئینانا وان پرسی، لێ سەرۆکێ باژێرڤانیا زاخۆ گۆت: ھەتا نوکە مە ئەڤ رێنمایە بجھنەئیناینە، ژبەرکو چ تشتێ فەرمی بۆ مە نەھاتیە، و خەلکێ مە ژی ھەژار و دەستکورتە، باوەرناکەم شیان ھەبن ڤان رێنمایان بجهبینن.

دیسا ل گۆرەی زانیاریێن من وەرگرتین، ئەڤ رێنمایێن نوی نوکە ب تنێ ل دھۆکێ دھێنە بجهئینان، چەندین سال بوو سەندیکا ئەندازیاران بزاڤێن بجھئینانا ڤێ بریارێ دکر، بەلێ نە دھۆکێ و نە پارێزگەھێن دی ئەڤ رێنمایە نەکرنە د وارێ بجهئینانێ دا، ژ نوی ئەڤ سالە ل 1/3/2022 باژێرڤانیا دھۆکێ ئەڤ رێنمایە ئێخستینە د وارێ بجهئینانێ دا.

ئەندازیارەکی بۆ من ئاشکرا کر کو ئەڤ رێنمایە ژلایێ جڤاتا وەزیران ل سالا 2011 دەمێ بەرھەم سالح سەرۆکێ حکومەتا ھەرێما کوردستانێ دەرچوو بوون، بەلێ ل وی دەمی چ پارێزگەھان بجھنەئینان، ژبەرکو وان ھوسا دیت د بەرژەوەندا وەلاتیان دا نینن، ھەروەسا ل وی دەمی تەمەر رەمەزان پارێزگارێ دھۆکێ رازی نەببوو رێنمایان بجھبینیت، و پشتی وی فەرھاد ئەترووشی ژی پارێزگارێ بەری نوکە یێ دھۆکێ رازی نەببوو رێنمایان بجھبینیت.

ب من وەرە باژێرڤانی ھوسا ھزردکەت ئەگەر ئاڤاکرنا خانیان کەڤتە ل بەر سەرپەرشتیا نڤیسینگەھێن ئەندازیاری دێ زێدەگاڤی ل سەر ئەردێ حکومەتێ کێمتر لێ ھێن، ئەرێ ئەگەر حکومەت ب ڤی عەزامەتا خۆ ڤە نەشێن رێکێ ل زێدەگاڤیا بگرن، دێ چاوا نڤیسینگەھێن ئەندازیاری شێن ڤی کاری کەن؟

ھەروەسا ئەو ھزردکەن دێ رۆتین د دەرخستنا دەستووریا ئاڤاھیان دا کێمتر لێ ھێن، بەلێ نوکە رۆتین زێدەتر لێ ھات و جھێن دی ژی زێدەبوون، و ئێدی بۆ دەرخستنا دەستووریا ئاڤاھیان پێدڤیە ژبلی وان جھێن کەڤن یێن سەرەدان بۆ دکر، پێدڤیە سەرەدانا سەندیکا ئەندازیاران و نڤیسینگەھەکا ئەندازیاری ژی بکەن.