بۆچی باوەر محەمەد دەست ژ سترانان بەردا

08 گۆلان، 2022

گاڤ نیوز- تایبەت

هونەرمەندێ سترانبێژ باوەر محەمەد نووچەیێ دەستبەردانا سترانگۆتنێ بۆ گاڤ پشتراستکر و دیارکر؛ ب چ رەنگان ناڤەگەریتە ناڤ مەیدانا سترانگۆتنێ و ل بەرە بچیتە عومرێ.

د پەیوەندیەکا تەلەفۆنی دا بۆ گاڤ نیوز سترانبێر باوەر محەمەد گۆت: گەلەک ژ مێژەیە من نیەت بوو ئەز ب ئێکجاری سترانان بهێلم و ئەڤە 6 هەیڤە ئەز نەچوویمە چ شەهیان و ئاهەنگان و د رێکا خودێ دا و ژ ترسا خودێ من ئەڤ کارە هێلا و چ جاران ناڤەگەرم.

باوەر محەمەد پتر دبێژیت: بۆ من سترانگۆتن مەزنترین داهاتێ رۆژانە و هەیڤا هەبوو، رۆژ هەبوویە 4500 دۆلار من وەرگرتینە و کێمترین رۆژا کارێ من ب 500 دۆلاران بوو، لێ گەلەک ژ مێژە دایک و باب و داپیرا من حەز دکر ڤی کاری بهێلم و منژی لبەربوو، لێ بریار بەری رەمەزانێ من دایە.

ل دۆر وێ یەکێ کا چ پەیوەندیا هێلانا سترانان ب پێکئینانا خێزانێ ڤە هەبوویە؟ باوەر محەمەد دبێژیت: من بەری سێ هەیڤان ژن ئینایە و بریارا هێلانا سترانان گەلەک بەری وێ پرۆسەیێ بوویە.

باوەری نوکە دوکانەکا ئەرزاقی ل ناڤ سەنتەرێ زاخۆ هەیە و دبێژیتە حەژێکەرێن دەنگێ خۆ: ژ دل ژ من ببوورن و حەزناکەم سترانێن من بهێلنە دەف خۆ و بلا ژێ ببەن و رەنگە رۆژەکێ ب خواندنا  قۆرئانا پیرۆز بهێمە خزمەتا وان دا.

باوەری بۆ گاڤ گۆت: تنێ من ئینستگرام و سناپچات هەیە و ئەوژی نوکە من گرتینە و من چ پلاتفۆرمێن دی یێن سۆشیال میدیایێ نینە.

باوەر محەمەد پتری 5 سالایە وەکو سترانبێژ بەرنیاس بوویە و دو ڤیدیۆ کلیپ و چەندین سترانێن تۆمارکری هەنە.