ل سەر کێشەیەکا عەردی، هێزەکا مەزن ل سەرسنکێ یە

10 گۆلان، 2022

گاڤ نیوز – تایبەت 

کرستیانێن گوندێ بادەڕەشکێ و کەسەکی کێشە ل سەر هندەک عەردێن گوندی هەیە و ژ ئەگەرێ وێ کێشێ شەڕ ل گوندی چێبوویە.

ل گۆرەی زانیاریێن گاڤ، کرستیانێن گوندێ بادەڕەشکێ و کەسەکی کێشە ل سەر عەردێ گوندی هەیە، کرستیان دبێژن عەرد یێ وان و کەسێ دی دبێژیت من سەنەد هەنە کو ئەڤ عەردە یێ منە و ئه‌ڤرۆ ئێڤارى شه‌ڕ د ناڤبه‌را هه‌ردو ئالیان دا چێبوویه‌ و نوكه‌ ژى خه‌لكێ گوندى چه‌ك هه‌لگرتیه‌.

شێخ نەوزاد کو خۆ ب نوینەرێ بنەمالا شێخێن نەقشەبەندیێن بامەڕنێ ددەتە نیاسین، بۆ گاڤ دبێژیت: وی بەلگە هەنە هەر ژ سەردەمێ ئۆسمانیان تا سەردەمێ حکومەتا ئیراقێ ئه‌و عه‌رد یێن وى نه‌ و ب گۆتنا وى: گەلەک عەردێن وی زێدەگاڤی ل سەر هاتینە کرن و ب گۆتنا وی، پشتی سەرهلدانا سالا 1991ێ نەبتنێ کرستیانان، بەلکو موسلمان و ئالیێن حکومی و بەرپرسان ژی زێدەگاڤی ل سەر عەردێ وی کرینە. 

دەربارەی بابەتی، گاڤ پەیوەندی ب کلارا عۆدیشۆ، ئەنداما پەڕلەمانێ کوردستانێ کر و وێ گۆت: پتری 80 سالانە ئەو کرستیان ل گوندێ بادەڕەشکێ خۆجهـ، لێ کەسەک کو نەخەلکێ دەڤەرێ یە دبێژیت: وی سەنەد هەنە کو پشکەکا مەزن ژ عەردێ گوندێ بادەڕەشکێ یێ وی یە. 

هەروەسا گۆت: بەری نوکە لژنەیەک ل سەر ئاستێ پارێزگەها دهۆکێ هاتبوو پێکئینان و شەمعوون شلیموون، جێگرێ پارێزگارێ دهۆکێ سەرۆکێ وێ لژنێ بوو و وێ لژنێ ژی بریار دابوو بابەت بهێتە راگرتن و چ ژ هەردو ئالیان وی عەردی نەگرن تاکو دادگەهـ بریارێ ددەت.

وێ پەڕلەمانتارێ گۆت ژی: بەری دادگەهـ بابەتی ئێکلا بکەت، ئەو کەس ئەڤرۆ ل گەل ژمارەکا کەسێن دی چووینە داکو عەردی پەرژان بکەن، لێ شەڕ د ناڤبەرا وان و خەلکێ گوندی دا چێبوویە و کێشە مەزن بوویە.

ل گۆرەی زانیاریێن گاڤ، ژبەر وێ کێشێ خەلکێ گوندێ بادەڕەشکێ چەک هەلگرتیە و داکو کێشە مەزن نەبیت، چەندین هێزێن ئەمنی چووینە گوندی، تا نوکە ژی ئەو هێز ل گوندی نە و سوبەهی سپێدێ شاندەک ژ وەزارەتا ناڤخۆ یا هەرێما کوردستانێ و پارێزگەها دهۆکێ دێ چیتە وی گوندی داکو کێشە بهێتە چارەکرن.