پارتی دێ (گۆھورینان کەت یان پێگۆھوڕکانێ)...؟!

10 گۆلان، 2022

کوڤان حسێن

پشتی گەلێ کورد و کودرستانێ، پارتی مفادارترین ئالیێ کوردی بوویە ژ سەرھلدانێ و ھەمی رویدانێن پشتی ھینگێ ھاتین، لێ ئەو قالبێ پارتی خوە تێدا ئاسێ کری براستی ئێدی ناخۆت و پارتی وەک ھەر سازیەکا دی یا زیندی پێدڤی ب گۆھوڕینێ و نویبوونێ یە، نەک لسەر کاراکتەر و مروڤان، بەلکو لسەر ئاستێ پەیرەوی و ھەتا گۆتارا خۆژی.

پارتی پەیرەوەکێ حشک و (جامد) یی ھەی و ھەمی دەمان پیڤەرێ پارتی یێ ئۆرجینال ئەوە پێگریێ ب ڤی پەیرەوی بکەتن کو ھێشتا یێ سەردەمێ (بەلشەفیکا)یە، نە گیانێ وی نە ئالیەتا وی لگەل حزبەکا جەماوەری ناگونجیت ،پتر بۆ رێکخستنێن نهێنیە، نەک حزبەکا ھەمی جومکێن دەستهەلاتێ د دەستی دا. پارتی تێرا ھندێ شارەزا و سەربور ھەنە ڤەکۆلینا نموونێن خەلکێ بکەن ب چ شێوەی حزبەکا وەکو پارتی دھێتە ئیدارەدانێ. زەحمەترین بریارا پارتی گۆھوڕینە چ مروڤ بهێنە گۆھوڕین یان سیاسەت بھێتە گۆھوڕین. پارتی قەیرانا شیان و کادران نینە، لێ ھندی پارێزگارانە هزرا دکەتن، ب ساناهی بریارا گۆھوڕینێ نادەتن. سەروچاڤێن ھێلا پێشین و ناڤنجی یا پارتی پشتی کونگرەیێ (نەھێ) کێمترین گۆھوڕین تێدا ھاتینە کرن. بەرەبابێ پشتی سەرھلدانێ ھەر دیار نینە و پارتی خەزینا گەنج و شیانایە لسەر ھەمی ئاستان. گۆھوڕین ژ راستی ئەگەر گۆھوڕینا ھندەک کەسان بیت ب ھندەکێن دی بێ تامە و سەرکرداتیا پارتی ھەمی ئەو کاراکتەر تاقی کرینە و شیان و پەلێژانیا ھەمیان دزانن. ھندەک کەسێن پارتی (٣٠) سالە بەرپرسن و ھەمی ھێز و بریارا پارتی دخودا قەتیس کریە،  ئەگەر چەند شیان هەبن، 30 سال بەسن خانەشین بن یان بھێنە خەلاتکرن ئەگەر پاراستی بن ژ گەندەلی و دەستپیسیێ. ب کێمی پارتی 30 سالە حاکما کوردستانێ یە و دڤیا وەک پێشرەوا حزبێن دی دناڤ خۆدا چەند شانازیێ ب ئێک پەیکەریا خوە دکەتن د شێوەیێ ئیدارەیا خوە وەک حزب و بۆ دەولەتێ ژی دشێن پەنجێن تایبەت ھەبن. حزبێن ب عەمرێ پارتی ل رۆژھەلاتی د کێمن، لێ عەمر مرۆڤی رزگار ناکەت، ئەگەر مرۆڤ بخوە تێرا سەردەم و جھێ خوە ھشیاری گۆھوڕینێن مەزن نەبیت، پەیرەوەکێ حشک بۆ پارتی بۆ چیە، شوینا ببیتە رێکخستنەکا ئاسنی، جاران دبیتە ئاستەنگ بۆ ھاتنە پێشا شیانێن پارتی یان دەرفەتە بو ھندەکێن نەھەژی پوستێن پارتی پربکەن.حنێرا پارتی د ھندێ دایە جەماوەرەکێ مەزن و رێکخستنەک باش هەیە و ھەردەم حزبا ئێکێ بیت و بریارا دوماھیکێ ل دەڤ سەرۆک بارزانی ئێک لابیت. لێ ئەڤێ چ زامن نینە گۆھوڕینا وەلائی نەمایە شەرم یان لادان و خیانەت. نورمالە پارتی دابەزیت ئاستەکێ دی. لێ مەرجێ مانێ ل گۆپیتکێ زور زەحمەترە ژ ھەر ئەرکەکێ دی. پارتی ژی پێتڤی ب گۆھوڕینێ یە تا لگەل شەرت و مەرجێن ڤی دەمی بگونجیت و ل مەیدانا خەباتا نەتەوەی دا ژی رەونەقا خوە ھندا نەکەت.