گاڤ نيوز
ئاژانسه‌كا جيهانى يا نووچه‌يان ئه‌ڤرۆ رۆژا پێنجشه‌مبيێ راگه‌هاند كو رۆڤه‌را چينى يا ب ناڤێ Zhuzhong شيايه ئاڤێ ل هه‌ساره‌يا مه‌ريخێ ل جهێ هاتنه‌خوارا وێ ل سه‌ر هه‌ساره‌يێ ببينيت.
تۆرا CNN يا ئه‌مريكى ڤه‌گوهاستيه؛ داتايێن لێگه‌ڕيانا ده‌ستپێكى يێن Zhuzhong ل جهێ هاتنه‌خوارێ يا وێ ئاماژه‌يێ دده‌نه شياوا هه‌بوونا ئاڤێ، ل ده‌مه‌كێ گه‌له‌ك زانايان هزر دكر كو مه‌ريخ يا هشك و ساره.
وينه‌يێن Zhuzhong بۆ كه‌ڤرێن ده‌وروبه‌ر گرتين ديار دكه‌ن كو ژ به‌ر باى و ئاڤێ ئه‌و كه‌ڤره ژ جهێن خۆ چووينه و زانا دبينن كو ئه‌ڤ چه‌نده ژ بۆ ڤه‌ديتنا ديرۆكا ئاڤێ يا هه‌ساره‌يا مه‌ريخێ دێ يا هاريكار بيت.
لێكۆلينێن ژ به‌رى نوكه ژ به‌ر كه‌ڤه‌ركرنا سنووردار يا ئاميره‌يێن ئاسمانى يێن هاتينه بكارئينان، نه‌شيابوون بگه‌هنه ئه‌نجامێن هه‌ڤشێوه.
رۆڤه‌را چينى Zhuzhong ل 23ى تيرمه‌ها سالا 2020 ده‌ست ب گه‌شتكرنێ كربوو و ل 15ى گولانا سالا 2021 گه‌هشتبوو سه‌ر مه‌ريخێ و كارێ وێ ڤه‌ديتنا نيشانێن ژيانێ يه ل سه‌ر مه‌ريخێ و زانينا وێ چه‌ندێ كا دێ ئه‌و هه‌ساره‌يه ب كێر ژيانێ هێت يان نه.