گاڤ نيوز
ئه‌مريكا ئه‌ڤرۆ رۆژا ئه‌ينيێ داخواز ژ رۆسيا كر كو ئاگربه‌ستێ ل ئۆكراينا رابگه‌هينيت و شه‌ڕى براوه‌ستينيت.
ئه‌ڤرۆ ئه‌ينيێ بۆ ئێكه‌م جار هه‌ر ژ ده‌ستپێكا شه‌ڕێ رۆسيا بۆ سه‌ر ئۆكراينا، لويد ئوستۆن وه‌زيرێ به‌رگريێ يێ ئه‌مريكا په‌يوه‌نديه‌كا ته‌له‌فۆنى ل گه‌ل سێرگى شويگۆ وه‌زيرێ به‌رگريێ يێ رۆسيا ئه‌نجامدا.
جۆن كێربى په‌يڤدارێ ب ناڤێ پێنتاگۆنێ د به‌يانه‌كێ دا راگه‌هاند؛ ئوستۆن داخواز ژ رۆسيا كر كو ده‌ملده‌ست ئاگربه‌ستێ ل ئۆكراينا رابگه‌هينيت و ته‌كه‌زى ل سه‌ر گرنگيا به‌رده‌واميا هێلێن په‌يوه‌نديكرنێ دناڤبه‌را ئه‌مريكا و رۆسيا دا كر.
وه‌زاره‌تا به‌رگريێ يا ئه‌مريكايێ ’پێنتاگۆن’ ژ به‌رى نوكه چه‌ندين جاران راگه‌هاند بوو كو وه‌زاره‌تا به‌رگريێ يا رۆسيا هه‌ر ژ 24ى شوباتێ ده‌مێ ده‌ستپێكرنا شه‌ڕێ رۆسيا بۆ سه‌ر ئۆكراينا و تا نوكه به‌رسڤا په‌يوه‌نديێن ئه‌مريكا ناده‌ت.
شه‌رێ رۆسيا بۆ سه‌ر ئۆكراينا چوويه د رۆژا 79 دا و شه‌ڕ و په‌ڤچوون ل هه‌رێمێن دونباس و خاركيڤ و هنده‌ك ده‌ڤه‌رێن رۆژهه‌لات و باشوورێ رۆژهه‌لاتێ ئۆكراينا د به‌رده‌وامن.