گاڤ نيوز
رژێما ئيرانێ ئه‌ڤرۆ رۆژا ئه‌ينيێ 22 كه‌س ده‌سته‌سه‌ركرن كو پشكدارى د خۆپيشاندانه‌كا نه‌رازيبوونێ دا ل دژى بلندبوونا بوهايێن كه‌ره‌سته‌يێن خوارنێ و پێدڤيێن سه‌ره‌كى ل دو باژێڕێن باشوورێ ئيرانێ دا كربوون.
ئاژانسا ده‌نگێ ئه‌مريكا به‌لاڤكريه؛ ئه‌ڤ خۆپيشاندانه پشتى بڕيارا حكومه‌تا ئيرانێ ب بلندكرنا بوهايێن زه‌يتێ، مريشكێ، هێكان و شيرى هات.
پشتى بڕيارا حكومه‌تا ئيرانێ، بوهايێن وان كه‌ره‌سته‌يان ب رێژه‌يا 300% بلندبووينه.
ئاژانسا نووچه‌يان يا ئيرانى ئيرنا به‌لاڤكريه؛ د ماوه‌يێ شه‌ڤه‌كێ دا 15 كه‌س ل باژێڕێ دێزفول ل باشوورێ رۆژئاڤايێ پارێزگه‌ها خوزستان و حه‌فت كه‌سێن دى ل باژێڕێ ياسوج ل باشوورێ ئيرانێ هاتينه ده‌سته‌سه‌ركرن.
ديار ژى كريه؛ 200 كه‌سێن دى ل باژێڕێن دى يێن پارێزگه‌ها خوزستانێ خڕڤه‌بوونه‌ك ئه‌نجامداينه و شه‌ڕ و په‌ڤچوون دناڤبه‌را خڕڤه‌بوويان و هێزێن ئه‌وله‌كاريێ دا دروستبووينه.
ئاژانسێن ئيرانى به‌لاڤكرينه كو ئه‌ڤرۆ رۆژا ئه‌ينيێ ره‌وش ئارام بوويه و وێنه‌يێن ئيبراهيم ره‌ئيسى سه‌رۆكێ ئيرانێ د ناڤ بازارێن ئيرانێ دا بۆ گوهلێبوونا گازنده‌يێن وه‌لاتيان به‌لاڤكرينه.