رۆژنامه‌يێن ئه‌لمانى: ليڤاندۆڤسكى دێ يانه‌يا بايرن ميۆنيخ ب جهـ هێليت

13 گۆلان، 2022

گاڤ نيوز

ده‌زگه‌هێن راگه‌هاندنێ يێن ئه‌لمانى ئه‌ڤرۆ رۆژا ئه‌ينيێ راگه‌هاندن كو رۆبێرت ليڤاندۆڤسكى هێرشبه‌رێ پۆله‌ندى يێ يانه‌يا بايرن ميۆنيخ و باشترين ياريكه‌رێ جيهانێ ل سالێن 2021 و 2020 دێ رێزێن يانه‌يا پاڤارى ب جهـ هێليت.

رۆژنامه‌يا سپۆرت بێلد يا ئه‌لمانى ئاشكراكريه‌؛ ليڤاندۆڤسكى دێ يانه‌يا بايرن ميۆنيخ ب جهـ هێليت و د حه‌فتيێن بۆرى دا ياريكه‌رى بۆ يانه‌يێ دياركريه‌ كو ئه‌و گرێبه‌ستا خۆ ل گه‌ل يانه‌يێ نوى ناكه‌ت ئه‌وا كو ساله‌ك بۆ ب دويماهيك هاتنا وێ ماى.

مالپه‌رێ ’سپۆرت 1’ ژى ب پشتبه‌ستن ل سه‌ر ژێده‌رێن خۆ ئه‌ڤ‌ نووچه‌يه‌ پشتراستكريه‌.

مالپه‌رێ سكاى نيوز عه‌ره‌بيه‌ به‌لاڤكريه‌؛ كارگێريا بايرن ميۆنيخ يا رازى نينه‌ ده‌ستبه‌ردانێ ژ گۆلكه‌رێ خۆ يێ پۆله‌ندى يێ 33 سالى بكه‌ت ئه‌وێ هه‌ر ژ ده‌مێ ل سالا 2014 گه‌هشتيه‌ دناڤ رێزێن وێ دا 343 گۆل بۆ يانه‌يێ تۆماركرين.

ديار ژى كريه‌؛ ئه‌گه‌ر بايرن ميۆنيخ د هاڤينا ئه‌ڤ ساله‌ دا ليڤاندۆڤسكى نه‌فرۆشيت، دێ ياريكه‌رێ پۆله‌ندێ د هاڤينا بهێت دا ب رێكا گرێبه‌سته‌كا بێ به‌رانبه‌ر ل گه‌ل يانه‌يه‌كا نوى، دێ ياريگه‌ها ئه‌ليانز ئه‌رينا ب جهـ هێليت.

ناڤگينێن راگه‌هاندێ يێن ئه‌ورۆپى دياركرينه‌؛ ليڤاندۆڤسكى ل ڤێ دويماهيێ په‌يوه‌ندى ل گه‌ل يانه‌يا به‌رشه‌لۆنا ئه‌نجام داينه‌.

چاڤى هێرناندێز راهێنه‌رێ يانه‌يا كه‌ته‌لۆنى ل دۆر ڤێ چه‌ندێ دياركريه‌ كو ژ به‌ر ره‌وشا دارايى يا يانه‌يێ، گرێدانا هه‌ڤبه‌ستێ ل گه‌ل ليڤاندۆڤسكى دێ كاره‌كێ ئالۆز بيت.

رۆبێرت ليڤاندۆڤسكى يێ 33 سالى هێرشبه‌ره‌كێ پۆله‌ندى يه‌ و وه‌ك باشترين ياريكه‌رێ جيهانێ ل سالێن 2020 و 2021 ژ لايێ فيفايێ ڤه‌ هاتبوو هه‌لبژارتن.