كڕينا تويته‌رى ب ئاوايه‌كێ ده‌مكى دهێته‌ راگرتن و بوهايێ پشكێن كۆمپانيێ دهێنه‌ خوارێ

13 گۆلان، 2022

گاڤ نيوز

گرێبه‌ستا كڕينا تۆرا تويته‌رى ژ لايێ ئيلۆن ماسك ڤه‌ ب ئاوايه‌كێ ده‌مكى هاتيه‌ راگرتن.

ئيلۆن ماسك سه‌رمايه‌دارێ ئه‌مريكى د تويته‌كێ دا دياركريه‌ "كڕينا تويته‌رى ب ئاوايه‌كێ ده‌مى هاتيه‌ راگرتن" و ژ به‌ر ڤێ چه‌ندێ بوهايێ پشكێن كۆمپانيێ ب رێژه‌يا 16% دهێنه‌ خوارێ.

ئاژانسان ڤه‌گوهاستينه‌؛ ئه‌گه‌رێ راگرتنا مامه‌له‌يا كڕينا تويته‌رى بۆ وێ چه‌ندێ ڤه‌دگه‌ڕيت كو ماسك ل ژڤانێ هنده‌ك زانياريايه‌ بۆ پشتراستكرنا وان نووچه‌يان ئه‌وێن دياركرين كو ئه‌كاونتێن سه‌خته‌ د تويته‌رى دا رێژه‌يا 5% يا ئه‌كاونتێن تويته‌رى پێكدئينن.

ديار ژى كرينه‌؛ ئيلۆن ماسك كار ل سه‌ر ڤه‌ديتنا ژێده‌رێن وان ئه‌كاونتان بۆ ژناڤبرنا وان دكه‌ت چونكى دبينيت كو د پاشه‌رۆژێ دا دێ زيانێ ب تويته‌رى گه‌هينن.

ژ به‌رى نوكه‌ ئيلۆن ماسك ب بوهايێ 44 مليار دولاران تۆرا تويته‌رى كڕيبوو و پلانێن خۆ بۆ پێشڤه‌برنا تۆرێ راگه‌هاندبوون.‏