حه‌سه‌ن شه‌ريف: ئه‌م هونه‌رێ بيانى ژ هونه‌رێ ملله‌تێ خۆ هێژاتر دبينين

10 خزیران، 2022

گاڤ نيوز

هونه‌رمه‌نده‌كێ ناڤدارێ كورد گله‌يى ژ نه‌گرنگيپێدانێ ب هونه‌رمه‌ندێن كورد هه‌نه‌ و ديار دكه‌ت كو ئه‌م هونه‌رێ بيانى ژ هونه‌رێ ملله‌تێ خۆ هێژاتر دبينين.

هونه‌رمه‌ند حه‌سه‌ن شه‌ريف د مالپه‌رێ خۆ د سوشيال ميديايێ دا به‌لاڤكريه‌؛ هه‌بوونا زانینگه‌هه‌كا‌ پێشكه‌فتی وه‌كى‌ زانینگه‌ها ئه‌مریكی ل وه‌لاتێ مه‌ و ل باژێڕێ مه‌ كو كچ و خۆرتێن كوردان د وارێ زانستی یێ بلند دا تێدا‌ بخوینن ژ بۆ مه‌ خه‌ونه‌ك بوو، ئەز پیرۆزباهیی ل ده‌رچوویان و مالباتێن وان و هه‌مى كوردستانیان دكه‌م، لێ تشتێ كو ئه‌ز ئێشانديم ئەو بوو كو به‌رهه‌ڤكارێن ئاهه‌نگێ چ قیمه‌ت نه‌دانه‌ هونه‌رێ كوردی.

حه‌سه‌ن شه‌ريف زێده‌تر ژى گۆت "نه‌ ئەوە كو ئەم ل دژی موزیك، هونه‌ر و هونه‌رمه‌ندێن چ نه‌ته‌وه‌يه‌‌كێ نه‌ لێ ده‌ما هونه‌رمه‌ندێ تورك یێ ب ناڤێ مسته‌فا جه‌جه‌لی كو به‌رى نها سترانه‌ك ژ بۆ دهۆكێ گۆتبوو، د گه‌له‌ك كه‌نال و مه‌دیایا مه‌ دا ب ئاوايه‌كێ هه‌رێ زێده‌ فۆكس ل سه‌ر دهێته‌ دانان و به‌رهه‌مێن هونه‌رمه‌ندێن كورد دهێنه‌ پشتگوهـ هاڤێتن، ئە‌ڤ چه‌نده‌ ب واته‌یا وێ چه‌ندێ يه‌ كو بێحورمه‌تیێ ل هونه‌را كوردی و بێرێزیێ ب هونه‌رمه‌ندێن كوردان بكی".

ناڤهاتى ديار ژى كر؛ هيڤیدارم وه‌سا نه‌هێته‌ فێمكرن كو ئەم د نه‌ژادپه‌ر‌ستين و ل دژی هونه‌رمه‌ندێن نه‌ته‌وه‌یێن دى نه‌، لێ پاشگوهكرنا هونه‌رێ كوردی ژ بۆ مه‌ جهێ ره‌خنه‌كرنێ یه.

حه‌سه‌ن شه‌ریف هيڤی خوا‌ست كو هونه‌رمه‌ندێن وه‌لاتێن كو ب درێژاهیا دیرۆكێ كوردستان داگیركرين‌ قه‌بويل بكه‌ن كو د بن ئالايێ كوردستانێ دا‌ سترانان بێژن و ژیان و هونه‌رێ كوردان ره‌وا ببینن و زێده‌تر ژى گۆت "خوه‌زی فه‌ستیڤالێن مه‌زن ل هه‌مى باژارێن هه‌ولێر، دهۆك و سلێمانیێ هاتبانه‌ لدارخستن و هونه‌رمه‌ندێن ناڤدار يێن وان وه‌لاتان كو ب سالانه‌ زمانێ مه‌ قه‌ده‌غه‌ دكن بهێن و د بن سیبه‌را ئالايێ كوردستانێ دا‌ سترانان بێژن و ڤێ ئێكێ قه‌بويل بكه‌ن، لێ ده‌ما كو هونه‌رمه‌ندێن كورد بهێنه‌ پشتگوهكرن، وی ده‌می ئەم هه‌ست ب ئازاران دكه‌ين".

زێده‌ ژى كر: ژ بۆ مه‌ شانازی یه‌ كو سه‌رۆكێ هه‌رێمێ و سه‌رۆكێ حكومه‌تا كوردستانێ پشكداريێ و پیرۆزباهیێ ل خۆرت و كچێن وه‌لاتێ مه‌ د زانكۆیێ دا بكن، ئە‌ز ب ڤێ چه‌ندێ پڕ به‌خته‌وه‌ر بووم، لێ ده‌مێ كو من دیت ل سه‌ر حسابا هونه‌رمه‌ندێن كورد هونه‌رمه‌نده‌كێ نه‌ته‌وه‌يه‌‌كی دى دهێته‌ پێشخستن، گه‌ره‌ك بوو مافێ هونه‌رمه‌ندێن كورد هاتبايه‌ پاراستن و هونه‌رێ نه‌ته‌وه‌یێن دى ژ یێن كوردان بلندتر و هێژاتر نه‌هاتبانه‌ دیتن.