يانه‌يا دهۆك رۆنكرنه‌ك ل دۆر سكالایا ياريكه‌ر عه‌لا شبلى به‌لاڤكر

10 خزیران، 2022

گاڤ نيوز

يانه‌يا دهۆك ئه‌ڤرۆ رۆژا ئه‌ينيێ رۆنكرنه‌ك ل سه‌ر سكالايا ياريكه‌ر عه‌لا شبلى به‌لاڤكر و راگه‌هاند كو كارگێريا يانه‌يێ یا به‌رى نوكه‌ يا نه‌رم بوو ل گه‌ل ياريكه‌رى و مووچه‌يێ وى ددايێ لێ پشتى نه‌به‌رده‌واميا وى ل گه‌ل تيمێ و ژ هۆكارێن بێ ره‌وشتى ئه‌و ژ ياريێ هاته‌ راوه‌ستاندن.

د رۆنكرنا راگه‌هاندنا يانه‌يا دهۆك دا هاتيه‌؛ هه‌ر ژ ده‌مێ تۆماركرنا سكالایێ ژ لایێ یاریكه‌رێ به‌رێ یێ یانه‌یا دهۆك عه‌لا شبلی ڤه‌ ل دادگه‌هێن فیفایێ، هه‌ر زوى كارگێریا یانه‌یا دهۆك به‌رسڤا وێ سكالایێ دا، لێ چه‌ند خال هه‌نه‌ دڤێت هه‌مى بزانن.

ديار ژى كريه‌؛ كارگێریا به‌رێ گرێبەست دگه‌ل یاریكه‌رێ ناڤبری ل وه‌رزێ 2020-2021 ب مووچه‌يه‌كێ مه‌زن گرێدابوو و دەمەکێ کورت ما دگەل تیمێ و پاشى ئێکسەر چوو .

ئاشكرا ژى كريه‌؛ کارگێریا به‌رێ دگەل عەلا شبلی یا نەرم بوو و مووچه‌يێ وی ددایێ لێ پشتی نه‌به‌رده‌وامیا وی دگه‌ل تیمێ، ژ هۆكارێن بێ ره‌وشتی ئه‌و ژ یاریێ هاته‌ راوه‌ستاندن و پێرابوونێن یاسایی نەگرتنە بەر دا کو گرێبەست ب داوی بهێت .

راگه‌هانديه‌ ژى؛ پشتی یاریكه‌رێ ناڤبری دگه‌ل راهێنه‌رێ به‌رێ یێ یانه‌یا دهۆك عادل ناسر ب شه‌ر چووی، كارگێریا به‌رێ ئه‌و دوير ئێخست و سكالا ل سه‌ر نڤيسی، لێ ئه‌ڤ سكالایه‌ ‌ره‌وانه نه‌‌كر بۆ ئێكه‌تیا فۆتبۆلا عیراقێ و یا پارێزگه‌ها دهۆكێ ژی و ژ كێمخه‌میێ بابه‌ت هێلابوو هه‌لاویستی.

ئاماژه‌ دايه‌ وێ چه‌ندێ ژى؛ بابه‌تێ نڤيسارا موخاله‌سێ و سۆزنامه‌یێ كو یانه‌ ده‌ستبه‌رداری یاریكه‌رى بیت، ژ لایێ كارگێریا به‌رێ ڤه‌ هاتییه‌ به‌رزه‌كرن و ل ده‌مێ دویڤچوونێ ئه‌ڤ هه‌ردو نڤيساره‌ نه‌هاتینه‌ دیتن دا كو كارگێریا نوى پێرابوونان دەرحەقێ یاریکەری دا وه‌رگریت .

زێده‌ ژى كريه‌: راسته‌ ئه‌ڤ هه‌مى شاشیه‌ به‌رێ هاتینه ‌كرن، به‌لێ كارگێریا نوى خۆ ب خۆدانێ هه‌مى ئاریشه‌یێن یانه‌یێ دزانیت و دێ ڤی بابه‌تی ب زويترین ده‌م چاره‌سه‌ر كه‌ت.