ده‌سته‌يا خۆلا ئسپانيا داخوازا هه‌لوه‌شاندنا گرێبه‌ستا ئێمباپێ ل گه‌ل پاريس سان جێرمان دكه‌ت

17 خزیران، 2022

گاڤ نيوز

ده‌سته‌يا خۆلا ئسپانيا داخوازا هه‌لوه‌شاندنا گرێبه‌ستا نوى يا كيليان ئێمباپێ ستێرا يانه‌يا پاريس سان جێرمان ل گه‌ل يانه‌يێ ژ به‌ر بنپێكرنا رێسايێن ياريا پاقژ دكه‌ت.

ل گۆره‌ى رێسايێن ياريا پاقژ، پێدڤيه‌ بالانس دناڤبه‌را داهات و خه‌رجيێن يانه‌يان دا هه‌بيت، ده‌سته‌يا خۆلا ئسپانيا ژى داخواز دكه‌ت كو دويڤچوونا خه‌رجيێن يانه‌يا پاريس سان جێرمان بهێته‌ كرن.

ئێمباپێ ل گۆلانا بۆرى هه‌ڤبه‌سته‌كا نوى بۆ ماوه‌يێ 3 سالان ل گه‌ل يانه‌يا فره‌نسى گرێدابوو پشتى نه‌گه‌هشتيه‌ رێككه‌فتنێ ل گه‌ل يانه‌يا ريال مه‌دريد يا ئسپانى.

ئاژانسان ژ خوان برانكۆ نوينه‌رێ ده‌سته‌يا خۆلا ئسپانيا ’لاليگا’ د پرێس كۆنفرانسه‌كێ دا ل پاريس ڤه‌گوهاستينه‌؛ به‌رپرسيێن ده‌سته‌يا خۆلا ئسپانيا د به‌رهه‌ڤن كو بچنه‌ دادگه‌هێ دا كو ره‌وشا دارايى يا يانه‌يا پاريس سان جێرمان پێشچاڤ بكه‌ن.

يانه‌يا PSG ژ لايێ خۆڤه‌ ره‌ت دكه‌ت كو وان سه‌رپێچيا رێسايێن ياريا پاقژ كربيت، لێ ده‌سته‌يا خۆلا ئسپانيا گۆمانێن مه‌زن ل دۆر خه‌رجيێن مه‌زن يێن يانه‌يا فره‌نسى هه‌نه‌.