حکومەتێ ل دۆر هه‌ردو بهایێن پانزینێن 690 دینارى و 800 دینارى چ بڕیار دا ‌؟

19 خزیران، 2022

گاڤ نیوز

رۆژانه‌ دێ ئێك ملیۆن لیترێن پانزینا 690 دینارى ب دادپه‌روه‌رانه‌ ل سه‌ر پارێزگه‌هان هێته‌ به‌لاڤكرن و وه‌زاره‌تا سامانێن سروشتى دێ بزاڤێ كه‌ت ئاستێ به‌رهه‌مێ پانزینا 800 دینارى ب گه‌هینیته‌ 3 ملیۆن لیتران.

لاوه‌ند جه‌لال ئاغا، شیره‌تكارێ قانوونى یێ په‌ڕله‌مانێ كوردستانێ بۆ گاڤ نیوز راگه‌هاند، د كۆمبوونا په‌ڕله‌مانێ كوردستانێ و حكومه‌تا هه‌رێمێ دا بڕیار هاته‌ دان رۆژانه‌ ئێك ملیۆن لیترێن پانزینا 690 دینارى ب شێوه‌یه‌كێ دادپه‌روه‌رانه‌ ب سه‌ر پارێزگه‌هان دا بهێته‌ به‌لاڤكرن و وه‌زاره‌تا سامانێن سروشتى دێ بزاڤێ كه‌ت ئاستێ به‌رهه‌مێ پانزینا 800 دینارى ژى ب گه‌هینیته‌ 3 ملیۆن لیتران د ئێك رۆژانه‌ و دوپاتكر، رۆژانه‌ ئه‌و پێدڤى ب 5 بۆ 6 ملیۆن لیترانه‌.

هه‌روه‌سا دوپاتكر، بڕیاره‌ ل ده‌مه‌كێ نێزیك په‌ترۆلگه‌ها لاناز پانزینێ به‌رهه‌م بینیت و هاته‌ خواستن ئه‌و پانزینه‌ ژى ب سیسته‌م و بهایه‌كێ گونجاى بهێته‌ به‌لاڤكرن.

هه‌روه‌سا وان ژ حكومه‌تێ خواست ژى ب پشتبه‌ستن ب په‌ترۆلگه‌هێن ناڤخۆ به‌رهه‌مێ پانزینێ زێده‌ بكه‌ن، وه‌زاره‌تێ ژى دیاركر،ئه‌و دێ لێكۆلینان كه‌ن لێ ئه‌گه‌ر قه‌بارێ هنارتنێ بهێته‌ كێمكرن دێ كارتێكرنێ ل داهاتى بۆ مووچه‌ى كه‌ت و پێشتر گرێبه‌ست ل گه‌ل بكڕان هاتینه‌ كرن.

وى شیره‌تكارى گۆتژى: ده‌رباره‌ى گازوایلێ ژى دیاركر، نوكه‌ ژبلى بهایێ وێ بلند بوویه‌، روون و مادده‌یێن دى دهێنه‌ تێكهه‌لكرن و وه‌ك گازوایل دهێته‌ فرۆشتن،بكارئینانا وێ ژى ژ ئالیێ موه‌لیده‌یان ڤه‌ زیانه‌كا مه‌زنه‌ بۆ ساخله‌میا وه‌لاتیان و به‌لگه‌یێن پێدڤى ب حكومه‌تێ هاتنه‌ دان و ژ وه‌زاره‌تێ ژى هاته‌ خواستن، ئه‌و گازوایله‌ بۆ ده‌رڤه‌ بهێته‌ ره‌وانه‌كرن و وه‌زاره‌تا سامانێن سروشتى ژى تێكهه‌لكرنا وان مادده‌یان ب تاوان ناڤكر.

ل دۆر غازا مالان ژى و ئه‌وا بۆ ترومبێلان دهێته‌ بكارئینان، گۆت: نوكه‌ هزار و 100 ته‌ن دهێنه‌ به‌رهه‌مئینان و بڕیاره‌ ئه‌ڤ ساله‌ بۆ 250 ته‌نێن دى بهێنه‌ زێده‌كرن.

ل دۆر گازا مالان ژى وه‌زاره‌تێ پلانه‌ك ئاماده‌كریه‌ و دێ مفاى ژ غازێ بۆ دابینكرنا به‌رهه‌مێ ناڤخۆ به‌رى ره‌وانه‌كرنێ بینیت و هاته‌ خواستن بۆ دابینكرنا گازا سپى بۆ مالان هه‌ر ژ نوكه‌ دا به‌رهه‌ڤیان بكه‌ن.