خودێ زەلامان رەزیل نەکه‌ت!

21 خزیران، 2022


لوقمان ئاسیهى

تێبینى: گۆتارێن ل گاڤ نیوز دهێنه‌ به‌لاڤكرن، ده‌ربرینێ ژ هزر و بۆچوونێن نڤیسه‌رى دكه‌ن.

دەم یێ ژ دوازدەى شەڤێ دەربازبووى، تەخمینبکە تو و خێزانا خوە، تەنا، یێ ڤێگڕە فێقییەکێ یان هندەک چەرەزاتا دخون و ژ نشکەکێ ڤە دەنگێ زەنگا دەریێ حەوشێ هات و دەمێ تە ڤەکرى، زەلامەکێ ل سەر خوە، هێژ لاو و لێگداى کەتە همبەرى تە و گۆتە تە: من خوە هاڤێتە مالا خودێ و مالا تە، ئەز ئەڤێ درەنگییا شەڤێ هاتم و من قەستا تە کر، والله شەرمدکم بگەڕم و دەستێ خوە ڤەگرم، شەرم ژ خەلکى دکم و شەرم ژ عەیالێ خوە ژى دکم، چو د دەست من دە نەمایە و من نەساخێن د مال دە هەین و عەیالێ من دێ ژ دەست من دەرکەڤت. باشە د ئەڤی حالەتى دە، خوەلى نەیارەک، جامێرەکێ هۆسا بێتە بەر دەرییێ تە تو دێ چ کى؟

ئەز گەلەک جارا ب ئەڤی رەنگى هزرا کەسانێن خودان مۆچە دکم، تایبەت یێن مۆچەیێن وان کێم و گەلەک کێم، عەجەب هەمى نابنە خازۆک و دەستێ خوە ڤەناگرن!! نزا کابرایەکێ مۆچەیێ وى دۆرێن ٧٠٠ هزار دیناران و کێمتر بت و کرێدار و خودان زارۆ بت و خودێ نەکرى ئێک نەساخ ژى د مال دە هەبت، چاوا دقەتینت، تایبەت کو هەمى تشت دو قات و سێ قات و هندەک هێژ پتر ژى گران بووینە؟!! 

دوستەکێ منێ فەرمانبەر، وێ رۆژێ دگۆت: کەکۆ ئێدى کەس دەینا ژى دگەل من ناکت، ب کەنیڤە درێژى ددا ئاخڤتنا خوە: تو دزانى گەر ب ئەڤی دەستودارى بت، ئەز باوەردکم دێ وەل من ئێت ئێدى نەشێم د سویکێ رە ژى بێم و بچم، ژبەرکو پتریا دکان و مارکێتا من ب قەر تشتێن ژ دەف برین! هەلبەت، ئەز باوەردکم پتریا خەلکى تایبەت کرێکار و فەرمانبەران د هەمان ئەڤێ رەوشا دۆستێ من دەنە و بەلکى یا هندەکا هین خرابتر ژى بت.

پرسیار: جارێ مەعقولە حوکمەت کو خودان ژمارەیەکا بێ حسابا خەبیر و شەهرەزایانە نزانت فەرمانبەر و کرێکار د چ حالى دەنە؟ ما چێدبت تنێ ب هیڤیا خیتاب و وەعد و وعودێن سەر شاشەیان ڤەبن؟ مەعقولە حوکمەت نوزانت یا برس دکت چو تشت ناکت؟

رستەیەک دیرۆکى ب شاها فرنساى ماریا ئنتوانێتێ ڤە هاتیە بەستن دەما گۆتى: (ئەگەر هەژاران نان نە بت بخون بلا کێک و پسکێتا بخون)، ل ڤێدەرێ ئەز دبێژم پێدڤییە مەزنێن مە ژ تەلارێن خوە دەربکەڤن و ب دورستى هەست ب دەستتەنگییا خەلکێ خوە بکن، خەلکێ هەی نان نینە و پێچێنابت کێک و پسکێتا ژى بکڕن!!