ئیران دێ تبلێن 8 تاوانباران بڕیت

23 خزیران، 2022

گاڤ نیوز

ئیرانێ ب تاوانا دزینێ حوکمێ بڕینا تبلان بۆ هەشت کەسان دەرئێخستیە و نەتەوەیێن ئێکگرتی داخواز دکەت ئەو حوکمە نەهێتە بجهئینان. 

راڤینا شامداسانی، پەیڤدارا کۆمسیۆنا نەتەوەیێن ئێکگرتی یا مافێن مرۆڤی راگەهاند؛ حەفت ژ وان زەلامان نوکە ل زیندانا تەهران یا ناڤەندی نە و یێ هەشتێ ژی ب ناڤێ هادی روستەمی جهێ وی ناهێتە زانین، ژ بەرکو ل رۆژا 12ی ڤێ هەیڤێ بۆ جهەکێ نەدیار هاتیە ڤەگوهاستن.

هەروەسا دیارکر، بریارە ئەو هەشت کەس بۆ زیندانا ئیڤین ل تەهرانێ بهێنە ڤەگوهاستن و راپۆرت ئاماژێ ب وێ یەکێ ددەن کو دێ چار تبلێن دەستێن وان یێن راستی ب تەمامی هێنە بڕین.

نەتەوەیێن ئێکگرتی داخواز ژ ئیرانێ کر پێداچوونێ د سزایێن خۆ دا بکەت و ب چ رەنگان بڕینا پارچەیێن لەشی وەک سزا نەهێلیت، ژ بەرکو ل گەل قانوونا نێڤدەولەتی یا مافێن مرۆڤی ناگونجیت.

ل گۆرەی رێکخراوێن مەدەنی یێن ئیرانی، د ناڤبەرا سالا 2000 و 2020 حوکمێ بڕینا پارچەیێن لەشی بۆ 237 کەسان هاتیە دەرئێخستن و ژ وانا حوکمێ 129 کەسان هاتیە بجهئینان.