درامایێن تورکی و مالپەرێن سکسی "دو رەنگ و ئێک تام"

23 تەباخ، 2022

تێبینى: گۆتارێن ل گاڤ نیوز دهێنه‌ به‌لاڤكرن، ده‌ربرینێ ژ هزر و بۆچوونێن نڤیسه‌رى دكه‌ن.

مــازن شـنگالی 

پشتی سالا 2003 و ژناڤ چوونا ڕژێما بەعس خەلکێ ئیراقێ بگشتی ژ جڤاکەکێ گرتی و پاراستی بەرەڤ جڤاکەکێ ڤەکری و بێ سەمیان ڤە چوو، ل وی دەمی ژی خەلک وەسا تێدگەهشت کو هەر تشتێ پێشتر نەکری و نەدیتی، دڤێت بکەن و ببینن و  ژوان کارێن دەستپێکێ ئەو بوو دیتنا جیهانا ئەۆروپی و لێکدانا ئازادی و رەوشەنبیریێ هەر ئێک لدویف حەزا خۆ .

ڤەکرن و بکارئینان و دیتنا بەرهەمێن سکسی ژ سی دی و سەحن و سەتەلایتان د ناڤ مالان دا دەستپێکر و ڤەرێژا وێ گەهشتیە یا ئەم ئەڤرۆ تێدا کو بووینە مۆبایل و هەتا ژن و زارۆیێن مە ژی ئەم نزانین کی سەحدکەتە چ و بۆ چ و دێ چەوا وەرگریت و وەکو بۆمبەیێن چاندی نە ئەم نزانین کەنگی و لکیڤە و لگەل کێ دێ ب ژیان و پاشەرۆژا مەڤە پەقیت، لگۆری هەموو ڤەکۆلینێن زانستی و نۆشداری دهێتە گۆتن کو سکسی دو جۆرێن سەرەکی یێن هەین ئێک ئەوە یا کەسەک دکەت و یا دی ژی ئەوە یا کەسەک دبینیت و ب چ رەنگان ژی هەردو ناهێنە بەراوردکرن و وەکهەڤکرن، ژبەرکو ئەوا تو دکەی تو قەت نەشێی ببینی و هەر دەما مرۆڤەک دکەڤیتە دوی چارچووڤەی دا کو بۆچی ئەو ل گرتەیێن سکسی دا دبینیت نەشێت ل کەتواری ژی دا ببینیت وی دەمی دبیتە دەستپێکا ئاریشەکا بێ دویماهیک بتایبەتی ژی ئەگەر دناڤبەرا دو هەڤژینان دا بیت و پتریا وان ئاریشەیان ل دادگەهان و ب ئەنجامێن کارەساتبار ڤە دهێنە ئێکلاکرن و ئەڤە ژی دبیت ئاریشەکا جیهانی بیت و بساناهی نەهێتە کۆنترۆلکرن .


بەلێ درامایێن تورکی ژی کارتێکرنێن وان یێن نەرێنی گەلەک کێمتر نینن ژ یێن مالپەڕ و دیمەنێن سکسی، لێ دبیت درەنگتر و بەرزەتر دیاردبن، پتریا وان درامایێن دهێنە کوردستانێ لگەل ژیان و دابونەریتێن جڤاکی ناگونجن و بێی سانسۆر دهێنە وەرگێران بۆ زمانێ کوردی و دهێنە پەخشکرن و پشکا هەرە مەزن یا کارتێکرنا وان لسەر سنێلەیان ژ هەردو رەگەزان و کەسێن ژنوی دچنە د ژیانا هەڤژینیێ دا، بجورەکێ ئەوا ل وان درامایان دا دهێتە دیتن ژبلی هندێ کو هندەک ژ وان درامایان مێژویا تۆمارکرنا وان ڤەدگەریتن بۆ دەهان ساڵان بەری دەمێ پەخشکرنێ و ب پارەیەکێ زێدە دهێنە کرین د دەمەکی دا درامایا کوردی بەرەڤ نزمترین ئاست دهێتە پالدان و گرنگیەکا باش پێ ناهێتە دان، د دەمەکی دا ب وی پارەیێ مەزن کو درامایێن تورکی پێ دهێنە کڕین و وەرگێران د شیاندا بوو درامایا کوردی یا خۆمالی گەلەک پێ بەرەڤ پێشڤە بهێتە برن. ئەڤە ژلایەکی ڤە.

ژلایەکێ دی ژی ڤە و بەراوردکرنا وان لگەل مالپەرێ سکسی د هندێ دایە کو کارتێکرن و ئەنجامێن وان وەک هەڤن و هەردو ژی کۆمەلگەهێ بەرەڤ بەرەلایێ ڤە دبەن و خێزانان ب نەخۆشیەکا دۆم درێژ ژناڤ دبەن چەندین ئاریشەیان پەیدا دکەن، بۆ چارەسەریا ئەڤان هەردو بابەتان هند یا ب زەحمەت نینە، بەلکو بتنێ ئالیێن پەیوەندیدار ب رژدی بهێنە سەر خەت و مالپەرێن سکسی سانسۆر و قەدەغە بکەن و بریار بهێتە دان هەر کەنالەک درامایەکا تورکی بێ سانسۆر وناڤەرۆکێن نەگونجایی لگەل جڤاکی پەخش بکەت توندترین سزا بۆ بهێتە دانان.