مه‌ترسیا دویرخستنا یانا دهۆك ژ خۆلا نایابا ئیراقێ هه‌یه‌

21 ئیلوون، 2022

گاڤ نیوز – تایبه‌ت

یانه‌یا دهۆك یا وه‌رزشى بانگه‌وازا لایه‌نێن میرى و به‌رپرسێن دهۆكێ دكه‌ت كو مه‌ترسیا دویرخستنا یانا دهۆك ژ خۆلا نایابا ئیراقێ هه‌یه‌ و گه‌ر د 10 رۆژان دا ملیار دینارێن قه‌رێن خۆ نه‌ده‌ت، دێ هێته‌ دویرخستن.

ملله‌ت جه‌مال، ئه‌ندامێ ده‌سته‌یا كارگێرى یا یانه‌یا دهۆك یا وه‌رزشى بۆ گاڤ نیوز گۆت: ئێكه‌تیا ته‌پاپێى یا ئاسیا سیسته‌مه‌ك هه‌یه‌ ب ناڤێ سیسته‌مێ رێپێدانێ و هه‌ر یانه‌یه‌كا ده‌ربازى خۆلا نایاب ببیت دڤێت وان خالان بجهبینیت، هه‌رچه‌نده‌ یانا دهۆك شیایه‌ ده‌ربازى خۆلا نایاب ببیت، لێ ژبه‌ركو سكالایێن یاریزانێن كه‌ڤن ل سه‌ر یانێ هه‌نه‌ كو نێزیكى ملیار دینارێن وان نه‌هاتینه‌دان، له‌و مه‌ترسیا دویرخستنا یانه‌یا دهۆك هه‌یه‌.

هه‌روه‌سا گۆت: هه‌مى قه‌رێن ل سه‌ر یانه‌یا دهۆك د كه‌ڤنن، یێن سالا 2013 تا 2021ێ نه‌ و ئیداره‌یا نوى یا یانه‌یا دهۆك چ قه‌ر نه‌كرینه‌، هه‌رچه‌نده‌ هه‌مى لایه‌نێن په‌یوه‌ندیدار سۆزا هاریكاریا یانێ دایه‌، لێ وان كێشه‌یا ده‌مى هه‌یه‌ و دڤێت د 10 رۆژان دا ملیار دینارێن قه‌رێن خۆ بده‌ت.

ملله‌ت جه‌مال بانگه‌وازا لایه‌نێن میرى و به‌رپرسێن دهۆكێ دكه‌ت كو هه‌رزوى بهێنه‌ سه‌رخه‌ت و رێ نه‌ده‌ن ژبه‌ر قه‌رێن كه‌ڤن یێن یانێ ئه‌و ده‌ستكه‌فتێ مه‌زن یێ چه‌ند رۆژێن بوورى هه‌روه‌ بچیت.