"داخوازا نەمانا ڤیزا ناڤبەرا ئیراقێ و تورکیا دا هاتە کرن"

22 ئیلوون، 2022

گاڤ نیوز- دهۆک

د کۆنفرانسێ کارسازێن تورکیا و هەرێما کوردستانێ دا کو لسەر ئاستەکێ بلند بەرپرسێن تورکیا ئامادەبوون، داخواز هاتە کرن ڤیزە د ناڤبەرا هەردو وەلاتان دا نەمینیت.

چیمەن رەشید، پشکدارا کۆنفرانسی بۆ گاڤ دیارکر؛ ل باژێرێ کاستمۆن نزیک ل ئەنقەرە کۆنفرانسێ سالانە یێ کارسازێن تورکیا و هەرێما کوردستانێ هاتە ئەنجامدان کو هژمارەیەکا بازرگانێن ئیراق، تورکیا، لبنان و هەرێما کوردستانێ پشکداربوون و گۆت: بەحسا پێشڤەبرنا پەیوەندیێن بازرگانی دناڤبەرا هەردو وەلاتان،ئاستەنگی و پێدڤی و چەوانیا پێشڤەبرنێ دهێتەکرن ".

چیمەن رەشید، دیارکر ژی کو د کۆنفرانسی دا جێگرێ ژوورا بازرگانی و پیشەسازێن کوردستانێ داخوازکر ڤیزە دناڤبەرا تورکیا و ئیراقێ دا نەمینیت داکو پتر هاتنوچوون و  گەشەیا ئابۆری پەیدابیت" ڤیزە بارگرانیە بۆ وەلاتیێن ئیراق و هەرێما کوردستانێ".

بریکارێ وەزیرێ ئاڤەدانکرنا هەرێما کوردستانێ، پارێزگارێن سلێمانی و  کەرکووک، وەزارەتا بازرگانیێن هەرێما کوردستانێ و تورکیا و هژمارەیەکا بەرچاڤ یا کارسازێن ژن و زەلام پشکدارێن کۆنفرانسی نە کو ئەڤرۆ رۆژا دوماهیێ یە.