رێككه‌فتنا هه‌رێم و ئه‌مریكا چ بوو؟ وه‌زاره‌تا پێشمه‌رگه‌ى ناڤه‌رۆكا وێ ئاشكرا دكه‌ت

22 ئیلوون، 2022

گاڤ نيوز

ئه‌ميندارێ گشتى يێ وه‌زاره‌تا پێشمه‌رگه‌ ئه‌ڤرۆ پێنجشه‌مبيێ ناڤه‌رۆكا ياداشتنامه‌يا لێكتێگه‌هشتنێ يا دوهى د ناڤبه‌را وه‌زاره‌تا پێشمه‌رگه‌ى و وه‌زاره‌تا به‌ره‌ڤانيێ يا ئه‌مريكا دا ب به‌رهه‌ڤبوونا سه‌رۆكێ هه‌رێمێ و سه‌رۆكێ حكومه‌تا هه‌رێمێ هاتيه‌ گرێدان، ئاشكرا كر.

ليوا روكن به‌ختيار محه‌مه‌د، ئه‌ميندارێ گشتى يێ وه‌زاره‌تا پێشمه‌رگه‌ د پرێس كۆنفرانسه‌كێ دا ئاشكرا كر؛ ئه‌ڤه‌ نه‌ ياداشتنامه‌يه‌كا نوى يه‌ به‌لكو نويكرنا ياداشتنامه‌يا سالا 2016يه‌.

ديار ژى كر؛ ل گۆره‌ى ياداشتنامه‌يێ، ئه‌مريكا دێ ب چه‌كى و فيشه‌كان، پشته‌ڤانيا دارايى و شاره‌زايێن له‌شكه‌رى پێشكێشى پێشمه‌رگه‌ى كه‌ت.

دا زانین ژى؛ رێكخستنا هێزێن پێشمه‌رگه‌ى، پێگيرى ب راهێنانێن پێدڤى و رێكخستنا كاروبارێن كارگێرى يێن هێزێن پێشمه‌رگه‌ى د ياداشتنامه‌يێ دا هاتينه‌ به‌حسكرن.

ئاماژه‌ دا وێ چه‌ندێ ژى؛ رێككه‌فتن ل سه‌ر هێزێن پێشمه‌رگه‌ى و هه‌مى هێزێن ئيراقى دسه‌پينيت كو ل گه‌ل هه‌ڤپه‌يمانيا نێڤده‌وله‌تى و ب تايبه‌ت د به‌رسينگگرتنا تيرۆرێ دا د هه‌ڤكار بن.