ل دهۆكێ كچه‌ك ژبه‌ر گه‌فان 15 هزار دۆلاران ژ مالا خۆ ددزیت

22 ئیلوون، 2022

گاڤ نیوز – تایبه‌ت

ل دهۆكێ كچه‌كا قوتابى ژبه‌ر گه‌فێن به‌لاڤكرنا وێنه‌یێن وێ، 15 هزار دۆلاران ژ مالا خۆ ددزیت و دده‌ته‌ هنده‌ك په‌یجێن نه‌نیاس، پۆلیس ژى 4 تاوانباران ده‌سته‌سه‌ردكه‌ن كو ئێك ژ وان هه‌ڤاله‌كا وێ كچێ یه‌.

عه‌قید ئارام محه‌مه‌د، رێڤه‌به‌رێ به‌رهنگاربوونا توندوتیژیا دژى ژنان و خێزانێ ل دهۆكێ بۆ گاڤ رادگه‌هینیت: ئه‌ڤساله‌ ل سه‌ر خراب بكارئینانا سۆشیال میدیایێ 168 كه‌س ل دهۆكێ هاتینه‌ گرتن و هنده‌ك كه‌یسێن سه‌یر و جیاواز هه‌نه‌ و چیرۆكا كچه‌كێ ل قوتابخانه‌یه‌كا دهۆكێ بۆ گاڤ دبێژیت.

عه‌قید ئارام دبێژیت: وێنه‌یێن كچه‌كا قوتابى ژلایێ هه‌ڤاله‌كا وێ یا قوتابى ڤه‌ ب سێ كوڕان دهێنه‌دان، ئه‌و كور ژى ب په‌یجێن نه‌نیاس ب به‌هانه‌یا به‌لاڤكرنا وێنه‌یێن وێ گه‌فان ل كچێ دكه‌ن و نه‌چاردكه‌ن پاره‌یان بده‌ت، كچ ژى تا 15 هزار دۆلاران ژ باب و برا و دایكا خۆ ددزیت و دده‌ته‌ وان كه‌سان و رێڤه‌به‌ریا قوتابخانێ ژى خێزانا وێ ئاگه‌هدار دكه‌ن، كو كچا وان پێگیریێ ب ده‌وامێ ناكه‌ت.

رێڤه‌به‌رێ به‌رهنگاربوونا توندوتیژیا دژى ژنان دبێژیت: خێزانا وێ كچێ ئاگه‌هدارى بابه‌تى دبن و كچا خۆ دئیننه‌ رێڤه‌به‌ریا به‌رهنگاربوونا توندوتیژیێ و پشتى لێكۆلینان دیاربوویه‌، كو گه‌ف ل كچێ هاتینه‌كرن و هاتیه‌ نه‌چاركرن ب به‌رده‌وامى پاره‌ى بده‌ت، پۆلیسان ده‌ستا ب لێكولینێ كریه‌ و هه‌رچار تاوانبار گرتینه‌.

رێڤه‌به‌رێ به‌رهنگاربوونا توندوتیژیا دژى ژنان ب رێكا گاڤ دو په‌یامان بۆ خه‌لكێ پارێزگه‌ها دهۆكێ دبێژیت: ئێك ژ وان بۆ رێڤه‌به‌ریێن قوتابخانه‌یانه‌ ب تایبه‌ت یێن كچان كو هه‌ر كچه‌كا ئاماده‌ نه‌بیت یان داخازا مۆله‌تێ كربیت، خێزانا وێ بهێته‌ ئاگه‌هداركرن و خالا دویێ ژى ئه‌وه‌ خێزان ب خۆ دیڤچوونا زاڕۆیێن خۆ بكه‌ن و ل ده‌ما دیتنا هه‌ر گومان و گه‌فه‌كێ ل سه‌ر كچ و ژنان وان ئاگه‌هداربكه‌ن و هه‌ر تشت دێ ل ده‌ڤ وان پاراستى بیت و تاوانبار دێ هێنه‌ گرتن.